Ka Eke ki Wairaka - he pukapuka matihiko

 Kia ora rā koutou,

Nei rā tonu ngā oha nui ki a koutou katoa.  Anei tētahi pukapuka matihiko kua whakaritea e Whaea Leesha nō Te Kura a Iwi o Whakatupuranga Ruamano.  He tauira tēnei mō ana ākonga o te kura, he tino tauira hoki o te ako, hanga, tohatoha.  Ko te nui nunui ki a au, he āhuatanga papai o te noho ngātahi a te ao Māori me te ao hurihuri (ā mathihiko nei). 

Ko te mōteatea tawhito o Ka Eke ki Wairaka te kaupapa, tirohia tana pukapuka mō ngā whakamārama.

Ka Eke ki Wairaka

Ka Eke ki Wairaka

Click to read this book, made with Book Creator

https://read.bookcreator.com

Te whanake haere a ngā pūkenga matihiko

E tika tonu ana te kōrero; 'Ka mate kāinga tahi, ka ora kāinga rua'.
Ahakoa ngā taumahatanga o te wā, he hua tonu e tupu mai ana ki te ao mātauranga, otirā, ki ngā kura o Aotearoa nei.  Ko 'kāinga rua' nei, ko te ao matihiko, ā, ko ngā akoranga ki te kāinga.  Me mihi au ka tika ki ngā pouako e pukumahi ana, e whakarīrā ana ki te āwhina tonu te ao ako o ā rātau ākonga.

Mō tēnei whakairinga kōrero ka aro pū atu ahau ki te kura o āku tamariki ake, arā, ko Te Kura Kaupapa Māori o Te Rito.  Mā runga i ngā āhuatanga o te wā, kua whanake, kua tupu rawa te taha matihiko ki te kura, hei aha? Hei tautoko, hei manaaki i ngā ākonga o te kura i roto i ēnei wā pōhauhau.

Kua whakaritea e ngā pouako o te kura ngā pae tukutuku mō tēnā reanga, mō tēnā reanga kia tautokohia tēnei mea te ako ki te kāinga.  He nui ngā painga o ā rātau mahi ki a au, engari ko te taumata pea, ko ngā akonga mōteatea me ngā akoranga karakia.  Ko tētahi painga anō o taua mahi, ehara i te mea he akoranga ērā mō ngā tamariki anake, he akoranga mō te whānau katoa.  I tēnei ata tonu i te ako mātau i ngā kupu me ngā whakamārama o te mōteatea 'E Hine Āku', ā, kua whakairingia ngā akoranga katoa mō taua waiata tawhito ki te pae tukutuku o kura.  Kei reira ngā kupu, he oro matihiko, me tētahi pukapuka mārama nā ngā tamariki o te kura i tuhi.  He tino tauira tēnei o TKKM o Te Rito e whakatinana ana i ngā kōrero, i ngā ariā o Te Aho Matua;

4. TE AO
Ka pū te ruha
Ka hao te rangatahi
4.2 Kia kaua te tamaiti e herea ki te ao kōhatu. Kia watea hoki ia ki te kapo mai i ngā painga, i ngā māramatanga katoa o te ao whānui.

6. TE TINO UARATANGA
6.1 Kia mau, kia noho whakaaraara, noho koi te hinengaro o te tamaiti ki ngā mātau katoa hei arahi i a ia i roto i te ao hou.

Te pae tukutuku o TKKM o Te Rito

Anei tōku whānau e ako ngātahi ana, e pānui ana i ngā tuhinga whakamārama nā ngā tamariki tonu o te kura;

Nō reira, nei rā ngā mihi nui whakaharahara ki a koutou ngā pūkenga o te kura.

Te ako ki te kāinga

Nei ngā ngā mihi nui whakaharahara ki a koutou katoa,

Nā ngā pānga me ngā āhuatanga o te mate urutā o COVID-19 e hora whānui ana, kua hurirapatia katoa tō tātau ao.  Ahakoa te taumaha o aua āhuatanga, me whai rautaki tonu e tātau ki te manaaki i a tātau anō.  Ki a au nei, ko te ako tētahi tino rongoā mō te hinengaro o te tangata.

Pēnā ki a koutou, kei te noho pū mātau ki te kāinga mō ēnei wiki tata, ā, tokorima ā māua tamariki engari ko ngā teina tokorua anake o te whānau e noho ana ki te kāinga i tēnei wā.  Ko Te Rangipikia (7 tau tana pakeke) rāua ko Rangiwhiua (6 tau tana pakeke) ngā taonga o te ako i tēnei wā.  Inānahi rā i tīmata mātau i ētahi akoranga ki te kāinga, ko ētahi akoranga he mea nā kura i whakarite, ko te mahi māra tētahi, ā, he akoranga 'whakapaipai i te whare' tētahi atu.

Ki ōku whakaaro ko te ao matihiko tētahi painga o te ako i ēnei wā, ahakoa kua mau i a tātau ki te kāinga kei a tātau tonu ngā rauemi hei āwhina i te ako tawhiti, i te ako ki te kāinga.  Nā reira kei te whakatinanahia e tātau te kōrero;
'Ko te noho, ki te kāinga; ko te ako, ki te ao' (Living local , learning global)

Anei ētahi paku tauira o ngā mahi nō te rangi tuatahi, ko Te Rangipikia tēnei e rapu ana i tana mahi pāngarau ki te pae tukutuku o tana akomanga. Me mihi au ka tika ki tōna kura, ki Te Kura Kaupapa Māori o Te Rito, otirā, ki tō rāua tino pouako ko Whaea Hinewā Taurima.

Ko tō Starr pēpeha

Tēnā rā koutou e te ao matihiko,

Koia nei tētahi tauira mahi nā te akomanga o Matariki ki Te Kura ā Iwi o Whakatupuranga Rua Mano, koia rā te reanga tau 6 o te kura.  Nā Starr tēnei whakaaturanga i hanga.  Kei ako tonu rātau i ngā momo nuka, i ngā momo rautaki whakanikoniko mō te taupānga o Ata Kūkara.

Kei te ako hoki rātau i te pūkenga matihiko o te whakararau, ā, hei tauira, kua whakararaungia tana mahi ki taku pohi rangitaki nei.

He tauira o te mahi mō ngā mahi o te raumati.

Tēnā rā koutou,

I te ata nei i mahi mātau ko ētahi o te akomanga o Te Whiri (nō Te Kura o Ōtaki) i ngā mahi tauira nō Ngā Akoranga o te wā o Rēhua (Summer Learning Journey).  He kaupapa ako tērā nō Manaiakalani me Wolfe Fisher Research hei āwhina i te taha ako i ngā hararei o te wā o Rēhua (te raumati).  E ai ki ngā rangahau ka heke te taumata ako o ngā ākonga i aua hararei roa, nā reira he kaupapa tēnei hei manaaki, hei whakapakari i ngā pūkenga ako i ngā wā whakamatua.

Anei tā mātau mahi e pā ana ki tētahi kaiwaiata rongonui rawa ki te ao whānui, arā, ko Lorde.

Tirohia te pae tukutuku mō ngā whakamārama katoa:

Summer Learning Journey 2019-2020

E tika tonu ana te kōrero; Ko te manu e kai ana i te miro, nōna te ngāhere. Ko te manu e kai ana i te mātauranga, nōna te ao.

He mahi auaha tīhāte

Tēnā koutou,

Anei tētahi mahi whakatauira tīhāte nā Nukuao i hanga.  E ai ki te kōrero ā tērā tau ka whakakorengia te kura takawaenga ki Te Kura ā Iwi o Whakatupuranga Rua Mano, ka noho atu ngā tau 7/8 ki te kura teina, ka piki ake ngā tau 9 ki te Wharekura.  Nā reira e hanga ana ngā ākonga i ētahi tīhāte hei whakamahara ki te kura takawaenga o ēnei tau tata nei.  I hanga rātau i taua mahi ki te taupānga o Tānga Kūkara.

He hākoritanga paraoa pokepoke

Tēnā koutou,

Anei tētahi paku tauira a ngā mahi matihiko nō tēnei rangi.  I hanga mātau ko ngā teina o te Wharekura o TKKM o Rito ki te taupānga o 'Stop Motion'.  Kei te ako mātau i ngā āhuatanga, me te tūāpapa o te mahi hākoritanga ki te ao matihiko, ā, ko te hākoritanga paraoa pokepoke te momo mahi  i mahia.  Tōna 30 meneti noa te roa o te mahi hanga o te hākoritanga, kua mau pai i a rātau ngā āheinga o taua taupānga.

** Kāre i a au te mana pupuri mō te waiata