He tauira o te mahi mō ngā mahi o te raumati.

Tēnā rā koutou,

I te ata nei i mahi mātau ko ētahi o te akomanga o Te Whiri (nō Te Kura o Ōtaki) i ngā mahi tauira nō Ngā Akoranga o te wā o Rēhua (Summer Learning Journey).  He kaupapa ako tērā nō Manaiakalani me Wolfe Fisher Research hei āwhina i te taha ako i ngā hararei o te wā o Rēhua (te raumati).  E ai ki ngā rangahau ka heke te taumata ako o ngā ākonga i aua hararei roa, nā reira he kaupapa tēnei hei manaaki, hei whakapakari i ngā pūkenga ako i ngā wā whakamatua.

Anei tā mātau mahi e pā ana ki tētahi kaiwaiata rongonui rawa ki te ao whānui, arā, ko Lorde.

Tirohia te pae tukutuku mō ngā whakamārama katoa:

Summer Learning Journey 2019-2020

E tika tonu ana te kōrero; Ko te manu e kai ana i te miro, nōna te ngāhere. Ko te manu e kai ana i te mātauranga, nōna te ao.

He mahi auaha tīhāte

Tēnā koutou,

Anei tētahi mahi whakatauira tīhāte nā Nukuao i hanga.  E ai ki te kōrero ā tērā tau ka whakakorengia te kura takawaenga ki Te Kura ā Iwi o Whakatupuranga Rua Mano, ka noho atu ngā tau 7/8 ki te kura teina, ka piki ake ngā tau 9 ki te Wharekura.  Nā reira e hanga ana ngā ākonga i ētahi tīhāte hei whakamahara ki te kura takawaenga o ēnei tau tata nei.  I hanga rātau i taua mahi ki te taupānga o Tānga Kūkara.

He hākoritanga paraoa pokepoke

Tēnā koutou,

Anei tētahi paku tauira a ngā mahi matihiko nō tēnei rangi.  I hanga mātau ko ngā teina o te Wharekura o TKKM o Rito ki te taupānga o 'Stop Motion'.  Kei te ako mātau i ngā āhuatanga, me te tūāpapa o te mahi hākoritanga ki te ao matihiko, ā, ko te hākoritanga paraoa pokepoke te momo mahi  i mahia.  Tōna 30 meneti noa te roa o te mahi hanga o te hākoritanga, kua mau pai i a rātau ngā āheinga o taua taupānga.

** Kāre i a au te mana pupuri mō te waiata

He akoranga Tāhopumata ki Te Kura o Ōtaki

Tēnā rā koutou,

I ngā wiki tata nei i te ako matau o Te Mutunga Iho (ngā reanga 6/7/8 o te kura) i ngā āhuatanga o te taupānga o Tāhopumata.  Ko tā mātau, ko te whakarite i ētahi akoranga i roto i te reo Māori hei āwhina i ngā pūkenga matihiko.  Anei ngā kaupapa whiringa mō te mahi nei

• te hanga i te konae PNG
• te kōkohutia atu te honongaitua (ctrl + k)
• te mahi whakararau
• te pānoni i te/ngā āhuatanga tohatoha mō tētahi kōpaki
• te kōkohu atu i tētahi atahanga (mai te Tūhura)

Anei tētahi tauira a te mahi, he akoranga nā Malachi i hanga, ko te konae PNG tana kaupapa whakaako. Nei rā ngā mihi nui ki a koe Malachi.

He mahi whakararau; hei tauira

Anei tētahi tauira a ngā akoranga ki Te Kura ā Iwi o Whakatupuranga Ruamano o ēnei wiki tata. He hākoritanga tēnei i hangaia ki Ata Kūkara:

Tēnā koutou e te ao matihiko.
Nau mai anō ki taku rangitaki ako.  Kei te ako tonu mātau i te pūkenga o te mahi whakararau. Ko te whakararau tētahi tino āhuatanga o te mahi matihiko, ki te pānoni koe i ētahi āhuatanga o te kōnae tūturu kua whakaraungia ki te ipurangi, ka pānoni hoki taua kōnae ki ngā wāhi katoa kua tukua ki te ipurangi.
Anei tētahi tauira, nā mātau anō i hanga.
Ngā mihi nui!

Te Eketū o Te Rangi

Nei rā tonu ngā mihi nui whakaharahara ki te kaupapa o Te Eketū o Te Rangi, otirā, ki ngā pūkenga katoa o te ohu whakahaere o taua kaupapa.  E kore rawa ngā owha e mutu ki te haukāinga, ki te ahikā o Te Poho o Rāwiri, ā, he whare āhuru mōwai, he wāhi maimoa i te tangata.  Ko koutou o Tūranga-nui-a-Kiwa te whakatinanatanga o te manaaki, te whakatutukitanga o te atawhai, he maioha tēnei ki a koutou katoa.

I tērā wiki i haere atu ahau ki te whitinga o te rā, ki Tūranga-nui-a-Kiwa ki te kaupapa o Te Eketū o Te Rangi, he hui whakangungu mō ngā āhuatanga mātauranga o Te Tairāwhiti.  Te papai hoki o ngā kaikōrero, o ngā kaikauwhau o tēnei kaupapa.  Kāore i ārikarika ngā hua o te hui, anei ētahi o ngā kōrero kua mau ki tōku rae.

Mā te whānau, mā te kāinga kē tō tātau reo e ora ai.  Kaua e waiho noa te reo Māori mō te kōhanga reo me te kura - nā Kōkā Brenda Soutar

He mea hirahira te whakapono, ko te whakapono atu ki tō ake tuakiri, ko te whakapono ki a koe anō, me te whakapono ki ō āheitanga - nā Apryll Parata

He aha ētahi kaupapa whawhai mā te reanga e tipu haere ana?  Mutu ana ngā kēremi katoa, he aha kē ā rātau kaupapa taupatupatu?   - nā Ahorangi Linda Smith

Ko te reo ā ngā ākonga tētahi atu tino āhuatanga ki a au, i whai wā rātau ki te kauwhau mai, ki te waiata mai, ki haka mai anō hoki.  Ka mutu ko ngā tamariki te pūtake o te kura, nā reira me whai wāhi rātau ki te tuku o rātau whakaaro, o rātau wawata.  Kua tāpiri ki raro nei i tētahi tauira o te reo waiata, ā, ko te Kura o Manutuke tērā. E kī ana te kōrero, me he korokoro tūī.

He tāhopumata hei whakaatu i te mahi

Mōrena!

Anei tētahi mahi tāhopumata nā Te Rongomai.  Kei te ako mātau o Te Whiri i ngā pūkenga matihiko e pēnei ana:

• te mahi whakararau
• te pokatata mō te honongaitua (ctrl + k)
• te tuku atu ngā kiriata/tāhopumata ki ngā rangitaki

Te tāhopumata

He pānui whakataukī, he akoranga matihiko

Tēnā koutou,

I tērā wiki i haere atu ahau ki te Te Tai Poutini hei māngai mō Manaiakalani Education Trust, ko te āwhina i ētahi āhuatanga o mahi matihiko te tino kaupapa o taku haerenga. Koia nei tētahi tauira a ngā mahi nōku i Te Kura Tuarua o Hokitika.  Ko te mahi whakararau ki te whakairinga rangitaki te akoranga matua o tēnei tauira.  Ā, ko te whakataukī te kaupapa hei kawe i te taha hanga,  ko te taupānga o ata Kūkara te rauemi i whakamahia.
He rawe katoa taku noho atu ki Te Kura Tuarua Hokitika, otirā, ki ngā kura katoa o Hokitika me Mawhera.  Nei rā ngā mihi nui whakaharahara ki a koutou katoa o aua wāhi.

He haerenga mutunga kore.....

I te tau 2004 tīmata ai taku haerenga ki te whai i tō tātau reo, ā, kua atā waia haere mātau ko hinengaro, ko whatumanawa, ko taringa ki tēnei reo hirahira.  I tērā tau i kuhu atu au ki te ao matihko ki ngā kura Māori, i kuhu atu hoki au i te reo matihiko me te nui hoki o ngā kupu hou!  Rā atu, rā atu ka puta mai tētahi/ētahi kupu hou hei āwhina, hei whakararu.

Ahakoa te aha, he haerenga mutunga kore te ako i te reo.  Ā te Rātapu nei he kura reo, kua tākoha mai hoki tā mātau kōhanga i te pukapuka o 'He Iti Kahurangika' (nā Hēni Jacob).  Mutu kau ana te pānui a te pukuapuka, ka tukua ōku whakaaro....

He haerenga ki Te Waipounamu

Nei rā tonu ngā mihi nui ki a koutou e te ao rangitaki.

I ēnei wiki tata nei e haere atu ana ahau ki ētahi kura o Õtautahi, o Hokitika, o Māwhera hoki. Hei aha? Hei āwhina i ētahi āhuatanga o te ao matihiko, hei āwhina ake i ngā wāhanga reo Māori o ngā kura o aua rohe.

Kāore anõ kia oti te mahi engari anei ētahi atahanga o aua wāhi waiwaiā.

He akoranga ki Ataata Kūkara

I tērā atu wiki i whakaritea tētahi akoranga whakangungu ki te taupānga o Ataata Kūkara.  Ko Tānga Kūkara me ngā momo nuka māmā o taua taupānga te kaupapa o te whakangungu.  I hono mai ngā tāngata nō ngā tōpito katoa o te motu nei, arā, ko Te Hiku, Te Tairāwhiti, Tāmaki, Ōtautahi, me Hokitika.
Ko te reo Māori te reo i kawea te kaupapa rā, nā reira e rua pea ngā tino kaupapa, arā, ko te puna kupu o te ao matihiko me ngā ētahi nuka mō Tānga Kūkara.  
Anei te whakaaturanga nō taua akoranga ki Ataata Kūkara :)