Te reo whakaako a te tauira

Tēnā koutou,

He tāhopumata tēnei hei āhwina i ngā ākonga e noho ana i raro i te manaakitanga o te reo rangatira. Nā Nukuhou tēnei paku akoranga i whakarite.  Nei rā ngā mihi kau ki a koe e tama.

Kia kaha te reo Māori.

Te honongaitua

He akoranga ki te Tāhopumata

He nui rawa atu ngā akoranga ki te pae tukutuku o TiriAta hei awhina i ngā momo nuka, i ngā momo āheinga o tēnā taupānga , o tēnā taupānga. Engari ruarua noa iho ngā akoranga ki taua wāhi i roto i te reo Māori.  I ngā wiki tata nei i te akiaki au i ngā tauira o konei ki te whakarite i ētahi Tāhopumata, heoi anei tētahi nāku anō i whakarite mō te kōkohuhia atu tētahi atahanga ki ngā taupānga Kūkara.

Te Tāhopumata ki TiriAta

He whakangungu ataata Kūkara

I tērā wiki tū ai ētahi whakangungu ki te taupānga o Hui Ataata Kūkara hei aha? Hei wānanga i ētahi āhuatanga o te reo matihiko ki te ao mātauranga.  Ko māua ko Renee Raroa ngā kaiarahi o taua pō, he wā tuatahi pea tēnei mō whakapāho i ēnei momo hui ki te ao matihiko mō ngā pouako?
E kī ana te kōrero;
'Haere, e whai i ngā tapuae o Uenuku kia ora ai te tangata'.

Kua tāpirihia te whakaaturanga nō taua pō.

Kia tau te mauri!

He tauira mō te reo, he tauira mō te tohatoha i te whakaaro

I tērā marama tū ai ngā whakataetae o Ngā Manu Kōrero ki Tūranganui a Kiwa.  I reira kite ai ngā hua o te pukumahi a ngā taiohi o te motu whānui.  Anei tētahi o ngā tino tauira o taua kaupapa hirahira, ā, ko Te Ākauroa nō TKKM o Te Rito me tana kauhau e pā ana ki te oranga o te reo Māori.  He papai katoa tana tū me ōna whakaaro katoa, he wāhanga paku noa tēnei o te kōrero hei whakaatu i te taumata o tana tū.  Nā whai anō i riro i a ia te taonga Te Rawhiti Ihaka.

E te whakatinanatanga o te Te Aho Matua, e te pūkōrero o te kura, e Te Ākauroa e, nei rā ngā mihi nui whakaharahara ki a koe.

He rerekē te tirohanga

He nui ngā wero me ngā tauārai mō ngā ākonga Māori ki te ao matihiko, ko te raru nui e ruarua noa iho ngā rauemi i roto i te reo rangatira, engari he nui kē atu ngā tauārai e hoa mā.  
Ko ngā taupānga Kūkara tētahi o a mātau tino aronga, heoi ko te reo Pākehā te reo whakahaere o aua mea katoa.  Koia rā tētahi tino tauārai kua pā mai, ko te reo Māori te reo ka rangona (ā tohutohu nei), ko te reo Pākehā te reo ka kitea ki te mata o te pukarangi/rorohiko.  Nā reira he rerekē te tirohanga ā te karu ki tā te rongo a te taringa, he mea whakararu i te ako tērā?  Mēnā kua waia haere te ākonga ki ngā reo rua mō te pānui ehara i te mea he tino raru, engari me whai whakaaro e tātau ki ngā ākonga reo Māori kāre anō kia tino tīmata i ngā akoranga reo Pākehā (ngā reanga tau ono heke iho pea), pērā ki ngā tamariki kua noho pū ki ngā Kōhanga me ngā kura ka rumakina ki tō tātau reo rangatira.  Nā kōna i tīmata mātau ki waihanga i ētahi pānui hei awhina i ngā tamariki mō ehinu o ngā āhuatanga Kūkara, kua tāpiri tētahi tauira.
Pēhea ōu koutou whakaaro?  He rauemi e pēnei ana ā koutou?

Tū Atamai....

He tino kaupapa te 'cybersmart' mō te reanga matihiko o tēnei ao hurihuri, otirā, mō ngā tauira katoa o tēnā, o tēnā kura. I tukuna te ui ki tētahi mātanga reo kia whakaarohia ngā kupu tika mō taua kaupapa, ā, ko whaea Hēni Jacob te pūkenga rā.  Mutu ana ā māua whakawhiti whakaaro ko te Tū Atamai i te Ipurangi tāna whakatau.
Kāore i ārikarika ngā mihi ki a koe e Hēni!

Te puna kupu o te ao hāngarau......

"Kei te matatau haere taku reo"...... ko tērā pōauau ko tērā!  He ao anō, he reo anō te reo hāngarau, te reo o te ao matihiko. Rā atu, rā atu ko mātau ko rangirua, ko whakaaro e wānanga ana ehinu kupu Māori hei awhina i a mātau ko ngā akonga.
Hei paku tauira o te wiki nei, ko te kupu mō te taupānga Screencastify, arā, ko te Tāhopumata. Ngā mihi ki a koe e te mātanga e Te Mihinga Komene mō te whakamāori!
He kupu hāngarau anō tā tētahi hei awhina i a tātau?

He wānanga kei te haere

I tērā wiki i tīmata ngā wānanga whāwhā i te mātauranga matihiko (Digital Fluency Intensive) ki Ōtaki, otirā ki te kura o Waitohu.  Ko Manaiakalani ngā kaiwhakarite me ngā kaiwhakahaere o tēnei kauapapa.  He pouako, he tūmuaki rānei nō ngā kura o Ōtaki ngā tauira o tā mātau kaupapa ako.  Ā, ko ngā tūmomo āhuatanga o te ariā o Manaiakalani (te ako, te auaha, me te tohatoha) me ngā momo taupānga o Kūkara ngā tino kaupapa ako.


Wiki 1: I tirohia ngā āhuatanga o te Pātaka Kūkara (Google Drive) me Mahara Kūkara (Google Keep) e mātau.  He nui hoki ngā akoranga hou mōku e pā ana ki te taupānga o Mahara Kūkara, engari kāre e taea te whakamahi te tino āhuatanga o taua mea mō tō tātau reo Rangatira (i tēnei wā).  Ki te kapo tētahi whakaahua o te reo Pākehā e āhei ana taua taupānga ki te 'tango noa' aua kupu me te tāpiri atu ki tētahi mea Kūkara, pērā ki te Tuhinga Kūkara.
Wiki 2: Ko te Hui Ataata Kūkara (Google Hangout) me te Wātaka Kūkara (Google Calendar) ngā tino kaupapa ako mō te te wiki tuarua.  Kei te waea haere, kei te mātau haere ahau ki ngā momo nuka o aua taupānga.  Ko ngā āhuatanga o te hui mai tāwhiti me te āhei nga ki te mahitahi ki tētahi tuhinga ngā mea mīharo ki a au mō te Hui Ataata.




'Mā pango, mā whero oti ai te mahi'